Kiba Ithuh Ïa u Blei

“…hynrei, uta uba sngewsarong to un sngewsarong ha kane, ba u shemphang, bad ba u ithuh ïa nga...” Jeremiah 9:24

Haba ngi peit bniah ïa ka pyrthei mynta, ngi shem ba ka pynkiew skong ia kiba stad, kiba don ka spah ka phew, bad ïa kiba don ka bor. Hynrei, ha ka por ka jong u Jeremiah, u kren pyrshah ia kiba kum kita (9:23). Bad dei namarkata ka daw, ba ka hima Judah ka khyllem noh ha ki kti jong u Nebuchadnezzar. Ka daw bah kadei namarba ki nongialam jong ka ri, ki nongialam niam, bad ka ri hi baroh kawei, kam ithuh shuh ïa u Blei (2:8; 9:6).

Haba pyndonkam ïa katei ka kyntien ‘ithuh,’ ha kaba iadei bad u Blei, bunsien hi, ka thew sha ka jingïadei kaba shimet ka jong u Blei bad ki briew jong u; ka thew sha ka jingïadei kaba jylliew. Shuh shuh, haba ong, “ithuh ia u Blei,” ka mut ruh ban sngewthuh, ba u Blei u long “U Trai uba leh ïa ka jingleh ieit, ïa ka jingbishar, bad ïa ka hok, ha ka khyndew,”[1] naba ha kine, u Blei u sngewbha eh (v. 24). Dei haba ngi leh ia kitei, hakhmat u Blei bad ki briew, ba yn pynshisha ba ngi ithuh ïa uta u Blei uba ma ngi ngi mane.

Bunsien bunsien haba ka Ri ka hiar arsut, ngi kloi ban kynnoh ia ka kynrum kynram ha ka saiñ hima sima; ka don ka jingshisha ha ka. Hynrei, ka daw bah pat ka long ba ka Ri hi baroh kawei, kam don shuh ka jingithuh ïa u Blei. Namarkata, ka jingithuh ïa u Blei, ka long ka pdeng duh jong ka jingngeit khristan. Bad lada ngim pat iohmad da lade ïa u Trai, ka jingim ha kane ka pyrthei ka long kaba lehnoheikai.

PC: https://www.pexels.com/photo/open-bible-page-showing-book-of-jeremiah-29756526/

 

 

---

[1] Ïa ki jingmut jong kine, ngan sa nang kham batai ha ki devotions ki ban sa wan.