Ha ka jingim Khristan bunsien ngi kloi ban leit ha khmat U Blei ban pan
map na ka bynta ki pop jong ngi, hynrei sngewsih pat ba ha ki khep ki khep ngi
kloi ruh ban pyneh ia la ka jong ka dohnud haba ngi donkam ban map ia kiba
lehsniew ia ngi.
Kane ka pharshi ka iathuh ha ngi ba u don uwei u shakri uba shah ram ha u
Syiem bad kata ka ram ka kot haduh ka shiphew hajar talent. Lada ngi
khein ia kine ki talent ha ki por mynta, ki shong dor haduh ba lah ban siew
tulop ia kiba bylla sngi kumba ar lak sanphew hajar tylli ki snem.
Kaba sngewtynnad ka long ba uta Syiem u map lut noh ia kata ka ram hadien
ba uta u shakri u lah kyrpad rit ha khmat jong u. Hynrei, kaba sngewsih pat ka
long ba une ujuh hi u shakri uba lah shah map, um lah pat ban map ia la u para
shakri uba shah ram ha u, wat tang shispah dinari; kaba shong dor tang shispah
tylli ki sngi ka bai bylla. Bad haba uta u Syiem u lap ia kata u la
pynrem ia u.
Lada ngi thew tarajur ia ka jingmap ka jong U Blei ia ki pop jong ngi
bad kaba ngi ngi dei ban map ia kiba lehsniew ia ngi, kan long thik kum ha kane
ka pharshi, namar ka jingmap ka jong U Blei ka khraw palat ban pyniahap bad ka
pop kaba kiwei ki leh pyrshah ia ngi; kaba mut ba kadei ban suk ia ngi ban map
ia kiba lehsniew ia ngi.
Haba ngi iakren ia ka jingiamap kadon ruh ka jingiasnoh bad ka jingpynim
ka jong ngi shimet shimet. U Jisu u ong ha u Matthaios 6:14, “Naba lada phi map
ia ki briew ki ryngkang jong ki, U Kpa jong phi uba ha bneng un map ruh iaphi.”
U Petros U kylli na U Jisu “Katno sien ba u paralok jong nga un leh pop
ia nga, bad ba ngan map ia u? haduh hynniew sien? U Jisu U la ong, ngam ong ha
me haduh hynniew sien, hynrei hynniew phew sien hynniew (Matthaios 18:21-22).
Hangne ngi iohi ba u numbar hynniew u long u pdeng duh bad ka long kaba donkam
ba ngin ia puson khyndiat. Ia u numbar hynniew hi ha ka Bible ka thew ia ka
jingpyndep pura ia kiei kiei kiba U Blei U la leh; Ngi lah ban shim nuksa ia ka
jingshong thait U Blei ha ka sngi kaba hynniew, hadien ba U lah dep shna ia ka
pyrthei (Genesis 2:2-3).
U numbar hynniew hangne namarkata u kdew ba lada ngim pat map ia kiba
lehsniew ia ngi, ka jingpynim kaba ngi ngeit ngi lah iohmad kam long kaba pura
satia. Haba ngim map ia kiwei, ki pop kiba U Blei U la map ia ngi ruh yn
shim noh na ngi bad yn shim jingkhein ruh ia ki.
U Blei U la map ei ia ngi, kadei ruh ia ngi ba ngin ban ai kata kajuh ka
jingaiei sha kiwei pat.
Photo by Cup of Couple from Pexels: https://www.pexels.com/photo/photo-of-man-s-face-covered-with-paper-6633040/
Comments
Post a Comment